తెలంగాణ ధ్వని : తెలంగాణ శాసనమండలి ఎన్నికల్లో కరీంనగర్, నిజామాబాద్, ఆదిలాబాద్, మెదక్ పట్టభద్రుల నియోజకవర్గంలో జరిగిన పోరులో బీజేపీ అభ్యర్థి అంజి రెడ్డి విజయం సాధించారు. ఈ నియోజకవర్గంలో మొత్తం 56 మంది అభ్యర్థులు పోటీలో ఉన్నప్పటికీ, ప్రధాన పోటీ కాంగ్రెస్, బీజేపీ, బీఎస్పీ అభ్యర్థుల మధ్య జరిగింది. ఓట్ల లెక్కింపు ప్రారంభం నుండి, అంజి రెడ్డి ముందంజలో ఉండి, చివరకు విజయం సాధించారు.
ఇక, బీఎస్పీ అభ్యర్థి ప్రసన్న హరికృష్ణ ప్రచారంలో ప్రముఖంగా నిలిచారు. కాంగ్రెస్ టికెట్ దక్కకపోవడంతో, బీఎస్పీ మద్దతుతో బరిలోకి దిగారు. ప్రచారంలో, మొదటి ప్రాధాన్యత ఓటు ఇతర అభ్యర్థులకు వేసినప్పటికీ, రెండో ప్రాధాన్యత ఓటు తనకు వేయాలని ఆయన కోరారు. దీంతో, రెండో ప్రాధాన్యత ఓట్లు ఎక్కువగా వచ్చినప్పటికీ, మొదటి ప్రాధాన్యత ఓట్లు తక్కువగా రావడంతో, ఆయన మూడో స్థానంలో నిలిచారు. ఫలితంగా, ఎలిమినేషన్ ప్రక్రియలో ఆయన పోటీ నుండి తప్పుకున్నారు. రెండో ప్రాధాన్యత ఓట్లు ఎక్కువ ఉన్నప్పటికీ, మొదటి ప్రాధాన్యత ఓట్లు తక్కువగా రావడం ఆయన ఓటమికి కారణమని విశ్లేషకులు భావిస్తున్నారు.
ప్రసన్న హరికృష్ణ ప్రచారంలో బీసీ కార్డును నమ్ముకుని, బీసీ వర్గం నుండి ఎక్కువ మద్దతు పొందుతానని ఆశించారు. అయితే, ఈ వ్యూహం ఆశించిన ఫలితాలను ఇవ్వలేకపోయింది. మొత్తం మీద, మొదటి ప్రాధాన్యత ఓట్లపై తక్కువ దృష్టి పెట్టడం, రెండో ప్రాధాన్యత ఓట్లపై ఎక్కువగా ఆధారపడడం ఆయన ఓటమికి దారితీసిందని రాజకీయ విశ్లేషకులు అభిప్రాయపడుతున్నారు.
రిపోర్టర్. ప్రతీప్ రడపాక
