తెలంగాణ ధ్వని : తెలంగాణ అసెంబ్లీలో మంత్రి కేటీఆర్ కేంద్ర ప్రభుత్వంపై తీవ్రస్థాయిలో విమర్శలు చేస్తూ, రాష్ట్ర అభివృద్ధికి తగినంత సహకారం అందడం లేదని మండిపడ్డారు. తెలంగాణ ప్రజలకు కేంద్రం ఎటువంటి నిధులు కేటాయించకుండా పూర్తిగా విస్మరించిందని, ఇది రాష్ట్ర ప్రజల దోహలానికి వ్యతిరేకమని అన్నారు. బడ్జెట్‌లో తెలంగాణకు ప్రాధాన్యత ఇవ్వలేదని, రాష్ట్రానికి ఏ విషయంలోనూ న్యాయం చేయలేదని ఆరోపించారు. కేంద్ర మంత్రులు వరుసగా తెలంగాణను సందర్శిస్తున్నా, రాష్ట్రానికి ఒరిగే లాభం ఏమాత్రం లేదని, బడ్జెట్‌లో ఒక్క రూపాయి కూడా కేటాయించకపోవడం దారుణమని వ్యాఖ్యానించారు. కేంద్ర మంత్రుల పర్యటనలకు ఇక్కడ ఖర్చు పెట్టాల్సిన అవసరం రాష్ట్రానికి లేకపోయినా, ఆ ఖర్చును రాష్ట్ర అభివృద్ధికి వినియోగించి ఉంటే మేలు జరిగేదని అభిప్రాయపడ్డారు.
ప్రధాని నరేంద్ర మోడీ గతంలో చేసిన “తల్లిని చంపి బిడ్డను బతికించారు” అన్న వ్యాఖ్యలపై తీవ్రంగా స్పందించిన కేటీఆర్, తెలంగాణ రాష్ట్ర ఏర్పాటులో తీసుకున్న నిర్ణయాలను విమర్శించడాన్ని తీవ్రంగా తప్పుబట్టారు. ముఖ్యంగా ఖమ్మం జిల్లాలోని ఏడు మండలాలను ఆంధ్రప్రదేశ్‌లో కలిపిన తీరును ఆయన ఘాటుగా విమర్శించారు. తెలంగాణ హక్కులను హరించడం మాత్రమే కాకుండా, రాష్ట్ర అభివృద్ధికి అవసరమైన ప్రాజెక్టులను కూడా పట్టించుకోకుండా కేంద్రం నిర్లక్ష్యంగా వ్యవహరిస్తోందని ఆరోపించారు. కేంద్ర ప్రభుత్వం తెలంగాణ సంస్కృతిని గుర్తించేందుకు ఏమాత్రం ఆసక్తి చూపడం లేదని, వేల కోట్ల రూపాయలు కుంభమేళాకు ఖర్చు పెట్టినా, సమ్మక్క-సారలమ్మ జాతరను జాతీయ పండుగగా గుర్తించేందుకు మాత్రం ఏ మాత్రం ఆసక్తి చూపడం లేదని విమర్శించారు.
అలాగే, యువతకు ఉద్యోగాల కల్పన, రాష్ట్ర ఆర్థిక పరిస్థితి, సర్పంచులకు బకాయిలు వంటి అంశాలపై కూడా కేటీఆర్ తన అభిప్రాయాన్ని వ్యక్తం చేశారు. ప్రధాని మోడీ ఎన్నికలకు ముందు రెండు కోట్ల ఉద్యోగాలు కల్పిస్తామని హామీ ఇచ్చారని, తెలంగాణ ముఖ్యమంత్రి కూడా రెండు లక్షల ఉద్యోగాలు కల్పిస్తామని చెప్పారని, అయితే ఈ హామీలు ఇంతవరకు అమలుకావడం లేదని విమర్శించారు. రాష్ట్ర ఆర్థిక వ్యవస్థ గురించి తప్పుడు వాదనలు ప్రచారం చేస్తున్న వారిపై మండిపడుతూ, రాష్ట్రం ఆర్థికంగా బలంగా ఉంటే ఉద్యోగుల జీతాల జాప్యం ఎందుకు జరుగుతోందని ప్రశ్నించారు. రాష్ట్రంలోని గ్రామ పంచాయతీలకు రావాల్సిన నిధులు ఆలస్యం కావడంతో, సర్పంచులు తమ బిల్లుల కోసం ధర్నాలు చేయాల్సిన పరిస్థితి ఏర్పడిందని పేర్కొన్నారు.
అంతేకాకుండా, అసెంబ్లీలో ఆసక్తికరంగా జరిగిన ఓ సంఘటనలో, కేటీఆర్ “ఈ సభలో అప్పులేని వాళ్లు ఉన్నారా?” అని ప్రశ్నించగా, కాంగ్రెస్ ఎమ్మెల్యే భట్టి విక్రమార్క “నాకు అప్పులేదు” అని సమాధానమిచ్చారు.కేటీఆర్ వ్యంగ్యంగా స్పందిస్తూ, “మీరు గ్రేట్ భట్టి అన్న” అన్నారు. మరింతగా సెటైర్ వేస్తూ, “ఆర్థిక శాఖ మంత్రి కదా, అలాగే ఉండాలి” అని వ్యాఖ్యానించారు. ఈ సంఘటన సభలో నవ్వులను పండించింది.
కేటీఆర్ చేసిన ఈ వ్యాఖ్యలు, ముఖ్యంగా కేంద్ర ప్రభుత్వంపై చేసిన తీవ్ర విమర్శలు, రాజకీయ వర్గాల్లో తీవ్ర చర్చకు దారితీస్తున్నాయి. తెలంగాణకు న్యాయం చేయాలని డిమాండ్ చేస్తూ, ఆయన చేసిన ఆక్షేపణలకు కేంద్రం ఎలా స్పందిస్తుందనేది ఇప్పుడు కీలకంగా మారింది. కేంద్ర బడ్జెట్‌లో రాష్ట్రానికి సరైన ప్రాధాన్యత ఇవ్వకపోవడం, నిధుల కేటాయింపుల విషయంలో వివక్ష చూపడంపై రాష్ట్రంలో విస్తృత చర్చ జరుగుతోంది.
రిపోర్టర్. ప్రతీప్ రడపాక
