తెలంగాణ ధ్వని : వరంగల్ విద్య మరియు నవీనతలో ప్రధాన హబ్‌గా ఎదుగుతోంది. యువతకు ఆత్మనిర్భరతను పెంపొందించేందుకు, ప్రాంతీయ అభివృద్ధిని ప్రోత్సహించేందుకు, మరియు స్థానిక ప్రతిభను ముందుకు తేవడానికి విష్వంభర ఎడ్యుకేషనల్ సొసైటీ ఈ రోజు ఈ-సమ్మిట్ 6.0 ను విజయవంతంగా నిర్వహించింది. ఈ కార్యక్రమం స్టార్టప్ ఎకోసిస్టమ్‌ను బలోపేతం చేయడం, కొత్త ఆవిష్కరణలను ప్రోత్సహించడం, యువ పారిశ్రామికవేత్తల మధ్య సహకారాన్ని పెంపొందించడం లక్ష్యంగా నిర్వహించబడింది. పారిశ్రామిక సవాళ్లను ఎదుర్కొని వాటికి పరిష్కార మార్గాలను కనుగొనడం, పరిశ్రమ నిపుణులు, పెట్టుబడిదారులు, మెంటర్లతో నెట్‌వర్కింగ్ ద్వారా పెట్టుబడుల అవకాశాలను మెరుగుపరచడం కూడా ఈ కార్యక్రమం యొక్క ముఖ్య లక్ష్యాలలో ఒకటి. ఈ ఈవెంట్‌ను సుమ్విన్ మరియు వాగ్దేవి ఇంక్యూబేషన్ అండ్ బిజినెస్ యాక్సిలరేటర్ (VIBA) సంయుక్తంగా నిర్వహించారు.
ఈ కార్యక్రమానికి ముఖ్య అతిథిగా కేంద్ర ప్రభుత్వం విజ్ఞానశాఖ చైర్మన్ డాక్టర్ శ్రీ రమణన్ రామనాథన్ విచ్చేసి, గ్రామీణ మరియు పట్టణ యువత కొత్త టెక్నాలజీతో పరిశ్రమలను స్థాపించేందుకు ముందుకు రావాలని పిలుపునిచ్చారు. గ్రామీణ యువత మరియు మహిళలను పారిశ్రామికవేత్తలుగా, స్వయం ఉపాధి కలిగిన వ్యాపారవేత్తలుగా మార్చేందుకు భారత ప్రభుత్వం అనేక ప్రోత్సాహకాలు అందిస్తున్నట్లు వివరించారు.
అలాగే, ఐఐటీ హైదరాబాద్ తొలి డైరెక్టర్ డాక్టర్ యు.బి. దేశాయ్ మాట్లాడుతూ, యువత مصنوعي మేధస్సు ఆధారిత పరిశోధనలు చేసి, కొత్త సాంకేతిక ఆవిష్కరణలను ముందుకు తేవాలని అన్నారు. విద్యార్థుల ప్రాజెక్ట్ పనులను పరిశోధనలో ఉపయోగించి దేశ అభివృద్ధికి తోడ్పడాలని సూచించారు. లోక్‌సత్తా వ్యవస్థాపకుడు, మాజీ ఐఏఎస్ అధికారి డాక్టర్ జయప్రకాశ్ నారాయణ మాట్లాడుతూ, భారతదేశం మేధస్సుకు కేంద్రంగా మారిందని, యువత భవిష్యత్తుకు శక్తి కేంద్రమని చెప్పారు. దేశ అభివృద్ధి, మార్పు యువత ద్వారా సాధ్యమని, రాబోయే రోజుల్లో అనేక ఉద్యోగ అవకాశాలు లభ్యమవుతాయని, మాజీ రాష్ట్రపతి ఏపీజే అబ్దుల్ కలామ్‌ను ఆదర్శంగా తీసుకుని సమస్య పరిష్కార నైపుణ్యాలను మెరుగుపరచుకోవాలని సూచించారు.
ఈ కార్యక్రమంలో అనేక పెట్టుబడిదారులు, వ్యాపారవేత్తలు, సాంకేతిక నిపుణులు పాల్గొని తమ అనుభవాలను పంచుకున్నారు. ఇంజనీరింగ్, ఫార్మసీ, ఎంబిఏ, ఎంసీఏ, ఫిజియోథెరపీ, డిగ్రీ విద్యార్థులు, యువ ఇంజినీర్లు, పరిశ్రమ నాయకులు, ఆవిష్కర్తలు తమ ఆవిష్కరణలను ప్రదర్శించారు. ప్రభుత్వ విధానాలు, ప్రోత్సాహకాలు, నిధుల అవకాశాల గురించి అవగాహన పెరిగింది. అంతేగాక, ఇంటర్నేషనల్ స్టార్టప్ ఫౌండేషన్ వ్యవస్థాపకుడు శ్రీ జె.ఎ. చౌదరి, వాగ్దేవి కాలేజీల వ్యవస్థాపక అధ్యక్షుడు డాక్టర్ చి. దేవేందర్ రెడ్డి, వైస్ ప్రెసిడెంట్ డాక్టర్ వాహిని దేవి, డైరెక్టర్ డాక్టర్ వాణి దేవి, VIBA CEO సలీం జీవాని, సుమ్విన్ CEO కె. సాయి కిరణ్, ఇంజనీరింగ్, ఫార్మసీ, ఎంబిఏ, ఎంసీఏ, ఫిజియోథెరపీ, డిగ్రీ కాలేజీల డైరెక్టర్లు, ప్రిన్సిపాళ్లు, సుమారు 2500 మంది విద్యార్థులు హాజరయ్యారు. ఈ కార్యక్రమం సంగీత విభావరి, సాంస్కృతిక కార్యక్రమాలతో ముగిసింది.
రిపోర్టర్. ప్రతీప్ రడపాక
