తెలంగాణ ధ్వని : విక్టరీ వెంకటేష్ హీరోగా, అనిల్ రావిపూడి దర్శకత్వంలో తెరకెక్కిన ‘సంక్రాంతికి వస్తున్నాం’
చిత్రం సంక్రాంతి పండుగకు మంచి హిట్ అయ్యింది. ఫ్యామిలీ ఎంటర్టైనర్‌గా ప్రేక్షకుల్ని మెప్పించిన ఈ సినిమాలో బుల్లిరాజు పాత్ర హైలైట్‌గా నిలిచింది. రేవంత్ అనే చిన్నారి ఈ పాత్రలో నటించగా, ఆయన నటన సినిమాకి అదనపు ఆకర్షణగా మారింది.
బుల్లి రాజు పాత్రలో రేవంత్, ఎక్కువగా ఓటీటీలను చూసే పిల్లాడిగా కనిపిస్తాడు. పాత్రలో బండ బూతులతో సహా ప్రేక్షకులను నవ్వించడమే కాకుండా ఆలోచన కలిగించే అంశాలు కూడా ఉన్నాయి. కానీ, ఈ పాత్రపై విమర్శలు వెల్లువెత్తాయి. ‘‘ఇంత చిన్న పిల్లాడి చేత బూతులు తిట్టించడం సమాజానికి ఏ మెసేజ్ ఇస్తుంది?’’ అంటూ కొంతమంది విమర్శించారు.
తాజాగా ఈ విమర్శలపై డైరెక్టర్ అనిల్ రావిపూడి స్పందించారు. ఒక ఇంటర్వ్యూలో మాట్లాడుతూ, బుల్లి రాజు పాత్ర వెనుక ఉన్న ఆలోచనను వివరిస్తూ, ‘‘ఈ పాత్ర ద్వారా చిన్న సందేశం ఇవ్వడమే నా లక్ష్యం’’ అని చెప్పారు.
పాత్ర వెనుక ఉద్దేశం:
‘‘పిల్లలు పెద్దల పర్యవేక్షణ లేకుండా ఓటీటీలో కంటెంట్ చూస్తే, వాటి ప్రభావం ఎలా ఉంటుందో చూపించడమే ఈ పాత్ర ఉద్దేశం’’ అని అనిల్ చెప్పారు. ‘‘ఇంగ్లిష్, హిందీ వెబ్ సిరీస్‌లలో చాలా దారుణమైన బూతులు ఉంటాయి. అలాంటి కంటెంట్ పిల్లలకు తగదు. ఈ విషయంపై తల్లిదండ్రులకు అవగాహన కల్పించడమే మా ప్రయత్నం’’ అన్నారు.
అనిల్ రావిపూడి తన క్లారిటీని సిగరెట్ ఉదాహరణతో చెప్పాడు. ‘‘పొగ తాగడం ఆరోగ్యానికి హానికరం అని చెప్పాలంటే, సిగరెట్ తాగడం చూపించాలి. దానితో సిగరెట్‌ను ప్రమోట్ చేస్తామని అనుకోవడం తప్పు. ఇదే విధంగా బుల్లి రాజు పాత్రలోని బూతుల వెనుక ఉద్దేశం కూడా ఒక స్పష్టమైన మెసేజ్ అందించడమే’’ అన్నారు.
సినిమా విజయానికి బుల్లి రాజు పాత్రకు ప్రాధాన్యం:
ఈ చిత్రం ప్రేక్షకుల నుండి విశేష ప్రశంసలు అందుకుంది. ముఖ్యంగా బుల్లి రాజు పాత్రను థియేటర్లలో ప్రేక్షకులు గట్టిగా ఎంజాయ్ చేశారు. ‘‘ఈ పాత్ర సినిమాకు ప్రధాన ఆకర్షణగా నిలిచింది’’ అని అనిల్ రావిపూడి వెల్లడించారు.
సమాజానికి మెసేజ్:
అనిల్ రావిపూడి చేసిన ఈ స్పష్టీకరణతో, బుల్లి రాజు పాత్రపై విమర్శలకు బదులిచ్చాడు. ఒక ఎంటర్టైనర్ సినిమా కావడంతో పాటు, ఈ చిత్రం సమాజానికి అవగాహన కలిగించే ప్రయత్నం చేసింది.
‘సంక్రాంతికి వస్తున్నాం’ సినిమా మాత్రమే కాదు, దీని కథ, పాత్రలు, సందేశం కూడా సినిమాని మరింత ప్రత్యేకంగా నిలిపాయి.
రిపోర్టర్ .ప్రతీప్ రడపాక
