తెలంగాణ ధ్వని న్యూస్ : తెలంగాణ రాష్ట్రంలో స్థానిక సంస్థల ఎన్నికలపై ఉత్కంఠ కొనసాగుతోంది. గ్రామ పంచాయతీల్లో ఇప్పటికే ఏడాదిగా స్పెషల్ ఆఫీసర్ల పాలన కొనసాగుతుండగా, రేపటి నుంచి మున్సిపాలిటీలకు సైతం స్పెషల్ ఆఫీసర్ల పాలన ప్రారంభం కానుంది. రాష్ట్రంలోని 130 అర్బన్ లోకల్ బాడీస్ పదవీకాలం రేపటితో ముగియనుంది. దీంతో ప్రత్యేక అధికారుల నియామకానికి మున్సిపల్ శాఖ ఏర్పాట్లు పూర్తి చేసింది.
ఎన్నికలపై అస్పష్టత:
సీఎం రేవంత్ రెడ్డి గతంలో పలుమార్లు స్థానిక సంస్థల ఎన్నికలపై సమీక్షలు నిర్వహించినప్పటికీ, ఎన్నికల షెడ్యూల్‌పై ఎలాంటి క్లారిటీ ఇవ్వలేదు. రెండు, మూడు రోజుల్లో ఈ అంశంపై నిర్ణయం తీసుకునే అవకాశం ఉన్నట్లు సెక్రటేరియట్ వర్గాలు తెలిపాయి. బీసీ రిజర్వేషన్లను ఖరారు చేయడం, అనంతరం ఎన్నికల కమిషన్ షెడ్యూల్ ప్రకటించడం వంటి ప్రక్రియల వల్ల ఎన్నికల తేదీలపై ఇంకా స్పష్టత రాలేదు.ఒకవేళ ఫిబ్రవరి లేదా మార్చిలో ఎన్నికలు నిర్వహించకపోతే, ఎండాకాలం తర్వాత మే లేదా జూన్ నెలలోనే ఎన్నికలు జరిగే అవకాశం ఉంది. పదో తరగతి, ఇంటర్మీడియట్ పరీక్షలు, వసంతకాల పరిస్థితులు వంటి అంశాలు ఎన్నికల షెడ్యూల్ నిర్ణయంపై ప్రభావం చూపుతున్నాయి.
ప్రభుత్వ పథకాల ప్రభావం:
ప్రభుత్వం ఈ నెల 26న రైతుభరోసా, ఆత్మీయ భరోసా, కొత్త రేషన్ కార్డుల పంపిణీ వంటి పథకాలను ప్రారంభించనుంది. ప్రతీ గ్రామంలోనూ ఇళ్ల లబ్ధిదారులను ఎంపిక చేస్తుండటంతో, ఈ కార్యక్రమాల పాజిటివ్ ప్రభావం స్థానిక ఎన్నికల ఫలితాలపై ఉండొచ్చని పార్టీ వర్గాలు భావిస్తున్నాయి.
స్పెషల్ ఆఫీసర్ల నియామకం:
మున్సిపాలిటీలకు స్పెషల్ ఆఫీసర్ల నియామకానికి సంబంధించిన ఫైల్ ఇప్పటికే సిద్ధమైంది. చిన్న మున్సిపాలిటీలకు ఆర్డీవో స్థాయి అధికారులు, పెద్ద మున్సిపాలిటీలు, కార్పొరేషన్లకు అడిషనల్ కలెక్టర్లను నియమించనున్నట్లు సమాచారం. త్వరలోనే అధికారిక జాబితా విడుదల కానుంది.స్థానిక ఎన్నికల షెడ్యూల్‌పై ప్రభుత్వం ఏమి నిర్ణయిస్తుందోనన్న ఆసక్తి ప్రజల్లో నెలకొంది. రిజర్వేషన్లు ఖరారు చేయడం, ఎన్నికల తేదీల ప్రకటన త్వరితగతిన పూర్తి చేస్తే, ప్రజాస్వామ్య ప్రక్రియ కొనసాగడానికి మార్గం సుగమమవుతుందని అధికారులు భావిస్తున్నారు.
రిపోర్టర్.ప్రతీప్ రడపాక
