అష్టాదశ శక్తి పీఠాల్లో ఒకటి హింగ్ లాజ్ మాత ఆలయం..

స్థలపురాణం ప్రకారం అమ్మవారి తలలో కొంత భాగం ఇక్కడ పడిందని చెబుతారు. అందుకే ఇక్కడ విగ్రహానికి ఓ రూపు ఉండదు. చిన్న గుహలో మట్టితో చేసిన పీఠం మీద సింధూరం పూసిన రాయి కనిపిస్తుంది.

సంస్కృతంలో సింధూరాన్ని ‘హింగళము’ అంటారు..అందుకే హింగ్‌లాజ్‌మాత అని పూజలందిస్తారు భక్తులు. మరో పురాణ కథ ప్రకారం ఒకప్పుడు హింగులుడనే రాక్షసుడు ప్రజల్ని పీడించేవాడు.

ఆ రాక్షసుడిని సంహరించేందుకు అమ్మవారు అవతరించిందని చెబుతారు. హింగలుడు ఓ గుహలోకి వెళ్లినప్పుడు అమ్మవారు, హింగలుడిని సంహరించారు. అప్పటి నుంచి అమ్మవారికి హింగ్ లాజ్ అనే పేరు స్థిరపడింది.

హింగ్‌లాజ్‌దేవి ఆలయం లోయల మధ్య ఉంటుంది. అప్పట్లో ఈ ఆలయానికి చేరుకోవాలంటే చాలా కష్టపడాల్సి వచ్చేది. కానీ ఇప్పుడు పెరిగిన సదుపాయాలతో కష్టపడాల్సిన అవసరం లేదు.

పైగా నిరంతరం ఆలయం సందడిగానే ఉంటుంది. ఏటా ఏప్రిల్ లో నాలుగు రోజుల పాటూ ఉత్సవాలు జరుగుతాయి. ఆ సమయంలో భక్తుల రద్దీ ఎక్కువగా ఉంటుంది.

అనారోగ్యంతో బాధపడినవారు, ఆపదలు ఎదుర్కొనేవారు హింగ్ లాజ్ మాతని దర్శించుకుంటే అవన్నీ తొలగిపోతాయని భక్తుల విశ్వాసం. అందుకే

ఎంతో దూరం నుంచి భక్తులు ఇక్కడికి వస్తుంటారు. పైగా క్షత్రియుల్లో కొన్ని శాఖల వారికి ఈ అమ్మ కులదైవం. పరశురాముడు క్షత్రియులందరినీ హతమారుస్తున్నప్పుడు హింగ్ లాజ్ మాత కొందరు క్షత్రియులను రక్షించిందట..

అందుకే వారి వారసులు ఇప్పటికీ ఆమెను కొలుస్తారు.కేవలం హిందువులు మాత్రమే కాదు ముస్లింలు కూడా హింగ్ లాజ్ మాతని ఆరాధిస్తారు. వారంతా నానీ కీ మందిర్ అని పిలుస్తారు.

అమ్మవారికి కాషాయపు వస్త్రాలు, అగరొత్తులు అందిస్తారు. పాకిస్థాన్ లో దేవాలయాలన్నీ కాలగర్భంలో కలసిపోయినా..హింగ్ లాజ్ మాత ఆలయం ఇప్పటికీ చెక్కుచేదరకుండానే ఉంది.